Ég kláraði loksins að taka myndir af öllum kúnum og setja hér inn undir "Kýrnar sumar 2010", en það var svo mikil og góð sól að ég varð að drífa þetta af. Sólin á víst ekkert að fara á næstunni og líst mér ekkert á það ef menn ætla að fara í göngur um helgina ég reyni mitt besta til að sleppa við það, verst að á meðan spáin er svona góð þá eru menn ekkert stressaðir að fara að byrja á korninu.
Ég þreskti smá blett um daginn handa kúnum og það var ekki nema 67% þurrt, en mér finnst vera græn öx víða innan um og er það líklega vegna þurrka í vor og það því spírað eftirá eða þegar rigningin loksins kom.
Kýrnar mjólka ógurlega núna og er Negla 376 að mjólka mest eða allt upp í 38 kg á dag og um daginn voru 7 kýr yfir 30 kg á dag.

En nóg í bili
Kv Þórir

Góðan dag
Nú í þessum skrifuðu orðum er verið að rúlla síðustu túnin þetta árið fyrir utan eina 2,5 ha spildu sem þarf líklega að slá í fjórða sinn, en það er fjölært rýgresi. Þessi tún sem verið er að rúlla eru leigutún í Ysta-Gerði og bíst ég við að þar geti komið um 100 rúllur af leiðinlegri há sem ekkert er að gera með nema einhver vilji kaupa hana.
Kornþreskingin fer alveg að skella á af fullum þunga en víða eru akrar orðnir vel gulir þó að títan sé ekki enn dottin af. Spáin var á þá leið að nokkrir bændur voru farnir að ókyrrast, en nýjustu spár gera ráð fyrir blíðu um helgina og í næstu viku þannig að menn hafa róast í bili.
Ég hef verið að gera þreskivélina klára fyrir átökin og er klár í slaginn og vona ég bara heitt og innilega að vel muni ganga eins og undanfarin ár og ég þurfi sem minnst að slá grænfóður með vélinni því það finnst henni ekki gaman.
Síðan ég bloggaði síðast hafa fjórar kýr farið á vit feðra sinna en fyrst fóru Villa 295 Spunadóttir vegna hárrar frumutölu, hún var líka búin að skila sínu, og Krukka 342 Sendilsdóttir vegna kálfleysis. Krukka vigtaði 250 kg takk fyrir enda mikill skrokkur.
 Fyrir sirka hálfum mánuði fóru svo Katka 315 Klakadóttir vegna lélegra afurða en hún hefur aldrei skilað miklum afurðum, heldur bara flotið á því hversu þægileg hún var í mjöltum. Reyndar var hún farin að taka upp á því að selja illa á síðustu tveimur mjaltaskeiðum. Með Kötku fór Skörp 367 Skarpsdóttir vegna kálfleysis og svo skilaði hún heldur ekkert neinum rosalegum afurðum heldur.
Þennan síðasta blogglausa mánuð hafa svo 7 kýr og kvígur borið. Fyrst bara Huppa 137 Þrymsdóttir nauti undan Laufás 08003 og var hann settur á hér en við ákváðum að setja á fjóra bola til að eiga sjálf en undanfarin ár hafa allir nautkálfar verið seldir í Hallland. Þessi fékk nafnið Krókur. Harka 347 Kaðalsdóttir bar síðan nauti undan Þokka 08024 og varð mér þar að ósk minni og hann var settur á og heitir Kraftur. Síðan bar Gróska 306 og höfðum við beðið lengi eftir því vegna þess að hún er sægráskjöldótt og var sædd með Húsa 01001 sem á ekki að gefa rauðan lit þannig að spenningurinn var talsverður og var heitasta óskin kvíga í stíl við móðurina eða þá svarskjöldótt kvíga í stíl við Holstein kynið. En það kom naut, svarskjöldótt í stíl við holstein kynið og var hann því settur á og nefndur Holsteinn. Við ákváðum að eiga þennan kálf líka og setja á 5 naut því þessi lífgar upp á litaflóruna í fjósinu þó að það sé fjarri lagi að maður noti hann til undaneldis, til þess þarf hann að vera betur ættaður en móðir hans er ekkert sérstök í mjöltum.
Áður höfðum við sett á tvo ljósrauða nautkálfa undan Fimmu 334 Stokksdóttur og Skjanna 02030 og Stillu 1143 Gyllisdóttur og Aðli 02039. Fimmusonurinn heitir Gosi og Stillusonurinn Kóngur. Kóngur verður notaður í neyð ef sæðingarnar ganga ekki upp á einstaka grip. 
Næst var komið að Kríu 443 Laskadóttur að bera og hún bar nauti undan Heldi 08010. Þetta var vænn kálfur og verður hann seldur í Hallland. Kría kemur bara vel út og er fljót í mjöltum og er vel gerð að öðru leyti. Þó á ég eftir að sjá að hún skili afurðum því hún er jú komin útaf Kötku og það hefur ekki reynst vel hvað afurðir varðar. Kría er þó að mjólka vel en svo er að sjá hvort að hún hafi erft ættareinkennið, þ.e að missa nytina niður alltof fljótt.
Næst bar svo Negla 376 Slóðadóttir (heimanaut Fróðason) og þarna vonaðist ég heitt eftir að fá kvígu því að Negla er fanta góð kýr og var auk þess sædd með Glæði 02001, en viti menn það kom enn eitt nautið og það fimmta í röð og sjöunda nautið af síðustu 8 burðum. Þetta var reyndar stór og þykkur boli og gaman hefði verið að setja hann á sjálf en þar sem við höfum ekki pláss fyrir fleiri, þá fer þessi í Hallland.
Þá var að treysta á hana gömlu góðu Kommu mína um að koma með kvígu undan Skúm 08011. Reyndar er þetta ekki heppilegast pörunin hvað prótein varðar en það urðu smá mistök í pöntun á sínum tíma, hún átti að verða sædd með Síríus 02032. Komma er nefnilega undan Punkti 94032 og Skúmur undan Náttfara 00035 og eru þetta frekar léleg naut hvað varðar prótein, en mjólkurmagnið vantar ekki. Að sjálfsögðu klikkaði hún Komma mín ekki á þessu og bar fallegri svarleistóttri kvígu með stjörnu í enninu.
Hún var nefnd Skegla og er númer 571. Komma var aðeins slöpp eftir burðin en spratt á fætur þegar dýralæknirinn var nefndur á nafn og ber sig bara vel með sitt risa júgur. Líklega var þetta hennar síðasti kálfur, hún er búin að skila sínu blessunin og þá er bara að vona að júgurbólgan plagi hana ekkert og hún verði í góðu formi.
Síðust til að bera var svo Spöng 435 en henni var laumað undir naut í fjósinu á Grund í fyrravetur þegar fullreynt var að reyna að sæða hana. Þar var staddur Þollsonur frá Hvammi hér í sveit og vonaði ég að það kæmi bara naut því flest sem er undan Þolli er styggt og svo er Spöng líka hálfstygg. Júgrið á Spöng er líka ekki upp á marga fiska og spenarnir utarlega settir og grannir og er því ekkert skemmtilegt að mjólka hana, allavega ekki á meðan stálminn er. Já og á meðan ég man þá kom dautt naut þannig að ég grét það ekki. Spöng er strax komin á sláturlistann, þrátt fyrir ágætt útlit varðandi mjólkurmagn, við einfaldlega hleypum ekki svona júgrum í gegnum nálaraugað, því eins og maðurinn sagði þá er hnífurinn besta ræktunartækið.
Svo eru fjórar kvígur komnar inn í fjós til kúnna, þær Elja 454 Hörku og Laskadóttir, Buna 456 Sprænu og Gangandadóttir, Brana 467 Grósku og Haladóttir og Freyja 853 Tinnu og Kistilsdóttir en hún er dekurdýrið hennar Söru og er mikil eftirvænting þar á bæ þegar svarskjöldótta kvígan undan Skjanna fæðist, vonum bara að það rætist.
Buna er alveg að fara að bera og á ég jafnvel von á því í nótt, ef ekki, þá á morgun en hún á ekki tal fyrr en 2. sept.
Kýrnar hafa verið að mjólka vel undanfarið, þær hafa aðgang að repju, vetrarrýgresi úthaga og ýmiskonar heyi inni. Kornið er reyndar búið en það kemur ekki að sök á meðan matseðillinn lítur svona út. Fimma er yfirleitt að mjólka mest eða um 34 kg og svo eru Stilla og Negla í 30-32 og stöku sinnum hefur Stilla farið í 34 kg sem er met þar á bæ. Negla er reyndar en að græða sig eftir burðin og á efttir að bæta nokkuð við sig. Gróska hefur verið að ná 30 kg og Huppa og Harka hafa legið alveg upp við 30 kg. Þetta mjólka kýrnar á 5 kg af kjarnfóðri og þessu gróffóðri sem ég taldi upp, þannig að ef það væri borgað fullt verð fyrir umframmjólkina þá væri gaman

En nóg að sinni þangað til næst.
Kv Þórir

Veðrið er búið að vera mjög gott undanfarna daga og er ekkert lát á. Samkvæmt nýjustu spám á að vera mikill hiti og sól hér um helgina og ferðamannastraumurinn liggur hingað norður. Það er eitthvað sem segir mér að það verði nóg að gera í sundlauginni við Hrafnagilsskóla og í ísnum í Holtseli.
Kýrnar hefðu samt örugglega ekkert á móti því ef hitinn lækkaði um nokkrar gráður.

Sælinú lesendur
Ég hef ekki haft mig í þetta blogg lengi lengi en það er nú einu sinni þannig að þegar mikið er um að vera þá líður tíminn hratt og allt í einu er kominn mánuður eða meira frá því síðast.
Eins og áður sagði þá byrjaði heyskapur hér 4. júní og var honum lokið rétt mánuði seinna og innan þess tíma var tekinn sláttur tvö á fjölæra rýgresið. Allt gekk eins og í sögu, hlaðan orðin full og allar rúllur komnar heim í stæðu. Við náðum mest öllu fyrir rigningarnar nema einu 8 ha stykki sem er alltaf tekið síðast en þegar kom smá gluggi í veðrið á milli skúra þá var það slegið og rúllað í snarheitum. Síðan þá er varla búin að vera friður til heyskapar nema núna allra síðustu daga, þeim til mikillar armæðu sem ekki voru búnir eða langt komnir  með heyskapinn. Menn eru byrjaðir að slá upp á fullu núna hér niðri í sveitinni, en það er eitthvað í það að við byrjum aftur, ég verð bara að viðurkenna það að ég hef ekkert athugað hvernig sprettan er orðin. Nýræktirnar þornuðu illa í þurrkunum hér framan af sumri og brunnu sumar illa þar sem er grynnst á grjótið.
Við erum búin að vera að senda nokkrar kýr í kaupstaðinn undanfarið og síðast fóru Klukka 355 vegna júgurgalla og Bomba 386 Þrumaradóttir vegna þess að hún var orðin þríspena og bara heilt yfir óspennandi gripur. Núna í vikunni er búið að ákveða að senda svo Krukku 342 Sendilsdóttur vegna kálfleysis og Villu 295 Spunadóttur vegna hárrar frumutölu.
Nokkrar kýr hafa borið undanfarið og byrjaði Hrísla 337 Völustakksdóttir á að koma með kvígu undan Dreng 08004 sem fékk að sjálfsögðu nafnið Stúlka. Svo bar Fimma 334 Stokksdóttir loksins eftir 9 daga lengri meðgöngu en dagatalið sagði til um og kom með rautt naut undan Skjanna 02030 og nokkrum dögum seinna báru Stilla 1143 Gyllisdóttir og Saga 432 Moladóttir. Stilla kom með rautt naut undan Aðli 02039 og Saga kom með rauðbröndótta kvígu undan Þætti 08021. Nú bíðum við eftir að Harka 347 Kaðalsdóttir beri en hún er með kálf undan Þokka 08024 og vona ég að þar komi naut því Þokki var víst bara úlfur í sauðagæru. Huppa 137 Þrymsdóttir og Gróska 9306 eru svo líka að komast á tal en þar verða kálfarnir undan Laufás 08003 og Húsa 01001.
Kýrnar eru nýloknar við að bíta sumarrýgresið og eru komnar í repjuna og líkar það vel. Við skömmtum tvisvar á dag sirka 50 cm í senn og nýta þær repjuna vel þannig, mig minnir að lengdin sé um 130 metrar.

Já og ég á enn eftir að taka myndir af kúnum úti á beitinna og setja hér inn, ég er bara búin að taka mynd af Svipu 9312 til að senda á nautastöðina og ætlaði svo að nýta sólina sem átti að koma daginn eftir til að mynda hinar kýrnar en þá var bara skýjað þannig að þetta frestast enn um sinn.

En takk fyrir í bili.

Fyrir þá sem hafa gaman af þá gleymdi að minnast á að við erum búin að setja inn nýjar myndir hér af kvígunum og kálfunum sem fóru út í vor. Þið ratið þetta.
Kv Þórir

Góðan daginn lesendur nær og fjær.
Nú loksins nenni ég að skrifa eitthvað hér inn.
Nú er flagvinnu lokið hér og ég sáði repjunni á miðvikudag og valtaði flagið svo í gær. Þegar ég kom frá því að skila valtanum þá datt mér í hug að kíkja á sprettuna á fjölæra rýgresinu og það endaði þannig að ég fór inn í hlöðu, tók út sláttuvélina fór yfir hana og sló spilduna sem er 2,5ha. Þannig að við erum farin að slá, enda grasið orðið mikið og ekkert að gera með það að bíða lengur. Svo er útlit fyrir fína daga framundan og er áætlað að láta þetta liggja yfir helgina og rúlla þetta á mánudag-þriðjudag. En þó eru önnur tún ekki komin svo langt í sprettu að maður þurfi að fara að stressa sig.
Undanfarnir dagar hafa farið í girðingarvinnu, en við erum búin að girða af blett hér sunnan við heimreiðina fyrir minnstu kálfana. Svo er áætlað að koma kúnum á beit á túnin "suðurfrá" á næstu dögum. Þær hafa bara verið að fara út á kvöldin í lítið hólf og er bara gefið með inni, enda er þetta hólf ekki beint ætlað til mikillar beitar.

Kýrnar hafa aðeins verið að bera undanfarnar vikur og flestar komið með naut. Snerpa 371 kom með naut undan Pontíusi 02028 og Gyðja 447 Goðadóttir bar nauti undan Heldi 08010. Gyðja er komin saman við geldkýrnar aftur því júgrið slitnaði niður, eða mun slitna niður, og svo var hún með júgurbólgu og auk þess mjólkaði hún ekki nema 5-6 kg á dag þrátt fyrir að vera tekin á kúr við júgurbólgunni, þannig að þessi kvíga verður étin í haust. Klók 403 Umbadóttir bar nauti undan Laufás 08003 og lítur bara vel út með hana.
Ferskja 372 Trölladóttir bar aftur á móti fyrstu kvígunni hér undan Síríusi 02032 og Spesía 445 Bifursdóttir bar kvígu undan Laufás 08003. Þarna hefði alveg mátt koma naut því ekki líst mér á hana Spesíu, spenarnir langir og illa staðsettir og júgrið afturþungt.
Svo í gærkvöldi bar Smella 446 Gauksdóttir óvænt nauti undan Þokka 08024 þeim svikabola. Smella virðist vera fín kvíga enda tími til kominn að fá einhverja þokkalega kvígu inn eftir þær tvær síðustu. Smella átti ekki tal fyrr en 17. júní en litla bola hefur legið svo á að komast í heiminn.
Hér gekk drullupest í kúnum eins og á nokkrum öðrum bæjum hér í sveit, en pestin var frekar væg og tóku ekki allar kýrnar hana  og engin kýr varð illa veik. Það minnkaði aðeins í þeim í heildina en það skiptir engu þar sem við erum nú að reyna að draga úr mjólkurframleiðslunni í bili því það sér það hver heilvita maður að það er ekki skynsamlegt að framleiða langt undir kostnaðarverði. Þannig hafa margar kýr ratað inn á sláturlistan að undanförnu og fóru þrjár kýr á rúmri viku á kaupstaðinn. Það voru Mugga 415 vegna skapgalla og hárrar frumutölu, Dása 379 vegna lélegra afurða og skapgalla og Gæfa 375 vegna mjaltagalla, skapgalla og lélegra afurða. Fleiri kýr eru á listanum eins og Villa 295 vegna hárrar frumutölu, Krukka 342 og Perla 384 vegna kálfleysis, Bomba 386 vegna júgurbólgu í einum spena og lélegra afurða, Snerpa vegna lélegra afurða og svo jafnvel systurnar Ferskja 372 og Fíkja 407 vegna "lélegra afurða" en þó kannski helst vegna aðlögunar að framleiðsluheimildum. Svo eru það að sjálfsögðu kvígurnar Gyðja 447 og Spesía 445 sem verður ekki haldið aftur vegna fyrrgreindra ástæðna. Svo eru margar aðrar kýr í farvatninu en þó ekki fyrr en eftir að þær eru bornar þeim kálfi sem í þeim er, allt er þetta vegna aðstæðna sem við erum komin í útaf því að hingað til hefur ekkert gengið að fá kvóta og virðist sem skilningsleysið á rekstri kúabúa sé algjört hjá einhverjum köllum í Reykjavík sem öllu ráða. Hér er allt til alls nema kvóti og eins og gefur að skilja fjármagn til að kaupa kvóta en það virðist vera sama hvernig maður leggur dæmið upp, þvert NEI. En við sjáum til og verðum jákvæð það finnast leiðir maður lætur ekki menn sem augljóslega kunna ekki að fara með peninga ráða för.

En örugglega nóg í bili
Kv Þórir Torfum

Hér á heimilinu eru fjórir einstaklega ljúfir og skemmtilegir kettlingar sem bráðvantar heimili núna í endann maí. Þetta eru algjör kelidýr, sem myndu henta jafnt í fjósið sem og sem innikettir. Endilega hafið samband ef ykkur langar í einn eða vitið um einhvern sem langar í, en myndin hér að neðan er af þessum dúllum
kv Sara María

Sælir góðir lesendur nær og fjær
Vorverkin eru nú komin á fullt, þó fyrr hefði verið. Vorið hefur komið hægt þetta árið en nú virðist þetta allt vera að koma. Skítakstri fer senn að ljúka í bili og ætlum við að gera hlé á honum í bili eða þangað til að þarf að dreifa í grænfóðurakrana.
Áburðurinn ætti að fara að koma allra næstu daga og eitthvað af fræinu er komið í hús á Akureyri og ekki seinna vænna en að fara að róta í ökrunum til að hola því niður.
Girðingavinnan er komin af stað, en við erum búin að rífa slatta af girðingum hér í kringum bæinn sem verður skipt út fyrir rafgirðingar.
Sauðburður er líka byrjaður og hefur það gengið frekar brösulega hingað til því þrjú lömb af 8 eru dauð. Ýmist hafa þau fæðst dauð eða fæðst smá og ræfilsleg og drepist innan fárra daga.

Kýrnar voru teknar í fótsnyrtingu hér um daginn og voru snyrtar 41 kýr á milli mála. Kýr sem eru á förgunarlista sluppu en allar aðrar kýr fengu að prófa nýja básin hjá BSE. Tvær eru enn áberandi aumar í fótunum en það eru þær Plóma 328 og Íma 9315. Annars held ég að kýrnar verði algóðar þegar þær losna við strengina.
Katka 315 bar nauti undan Flóa 02029 í byrjun apríl og Fíkja 407 kom einnig með naut undan Þrym 02042 um miðjan mánuðinn. Apríl virðist ætla að vera nautamánuðurinn mikli hér á bæ.
Við Sara héldum upp á afmælið okkar hér í fjósinu þann 16. apríl og skreyttum fóðurplássið og breyttum því í veislusal og buðum vinum og nánustu ættingjum í súpu og kökur. Upp úr krafsinu hafðist viðbót í bústofninn okkar og heilt hús. Systkini Söru gáfu okkur lítið bjálkahús úr austfirsku lerki og Arnar og Ásta á Hranastöðum færðu okkur vikugamlan kvígukálf undan Keip 07054. Hún var nefnd Skata og er númer 800. Við létum hana heita í höfuðið á ömmu sinni sem var feit og mikil kýr á Hranastöðum þegar við unnum þar saman sumarið 2004. Næst ber Gyðja 447 Goðadóttir sínum fyrsta kálfi og verður hann undan Höldi 08010 (Höldur veit ekki alveg hvernig þetta fallbeygist). Svo koma Snerpa 371 og Ferskja 372 sama dag með Síríus og Pontíus, þá er bara að krossleggja fingur og biðja um kvígur.
En annars er lítið annað merkilegt í fréttum ég er enn í sæðingunum og verð allavega fram að mánaðarmótum ef ég verð ekki orðin viðþolslaus að komast til að gera eitthvað af viti, en verknemin hann Ágúst rúllar þessu upp á meðan.

Sæl að sinni
Þórir.

já og hér eru ljúfir og krúttlegir kettlingar sem þurfa að komast á gott heimili
hafið bara samband ef þið viljið eignast þannig.

Vegna nokkurra áskoranna þá skal ég deila með ykkur skemmtilegri frásögn af því þegar ég varð fyrir barðinu á þvottaburstum í Lely róbót.

Helgina fyrir páska tóku ég og Þórir að okkur að gera í fjósi á Refsstöðum í Borgarfirði. Þar eru allmargar kýr og tveir Lely róbótar. Nokkrar kvígur höfðu borið fyrir ekki svo löngu og voru enn að læra á róbótinn og þurftum við þess vegna að hjálpa þeim. Ein kvígan var alveg sérlega óþæg og þurftum við Þórir því að vera bæði í því að hjálpa rótbótnum að koma tækjunum á hana. Við vorum sitthvoru megin við rótbótinn og ég þeim megin sem mjaltaarmurinn er.
Allt í einu finn ég að það er þrifið í hárið á mér, ég skil ekki neitt í neinu. Þá hafði þvottaburstinn náð í stertinn á mér, þegar hann var að skola sig og rúllað hárinu svona fallega utan um sig, svo ég stóð pikkföst í burstunum. Ég kallaði á Þóri að koma og hjálpa mér, því ég gat ekkert gert, sat bara föst með hausinn alveg við burstana. Ópin voru víst svo hræðileg að Þórir þorði varla að koma, hann hélt að hann myndi bara sjá blóð og læti. En svo var ekki, bara klaufinn ég búin að festa mig í þvottaburstanum.
Þórir ætlaði reyndar aldrei að geta losað mig fyrir hlátri og að sjálfsögðu fannst mér þetta alveg drepfyndið, enda ekki annað hægt en að hlæja af svona hrakfallasögu.
Ég vil bara ráðleggja ykkur að passa ykkur á þessum burstum, þeir geta greinilega verið stórhættulegir
En nóg í bili
kv Sara María

Góðan dag

Þar sem Arion "blanki" er farinn að gæta siðferðis og vill ekki mismuna viðskiptavinum sínum þá fæst hér ekki keyptur kvóti þannig að kúnum fer ört fækkandi. Þetta var skýringin hjá þeim þegar pabbi fór og bað um lán til að kaupa kvóta sem svarar til eins og hálfs mánaðar framleiðslu hjá okkur á þessu verðlagsári. Það var sama hvernig dæmið var sett upp fyrir þá ekkert fékk þeim haggað og að lokum þegar búið var að sýna þeim fram á hagkvæmni þess fyrir alla aðila að keyptur yrði þessi kvóti þá gripu þeir til þessarar ástæðu, "nei við verðum að gæta að siðferði okkar og mismuna ekki viðskiptavinum okkar því fleiri en þið eruð í þessari aðstöðu að vanta aðeins kvóta til að laga reksturinn". (eða eitthvað á þessa leið)  Það er alveg magnað að nú séu bankarnir farnir að hugsa um siðferði það hefur ekki alveg verið efst á baugi þegar kemur að því að gera upp við gamla "vini".

En nóg af svona vitleysu
Eins og ég sagði þá fækkar kúnum hérna nokkuð ört og nú síðast fóru fjórar kýr. Hviða 419 fór að sjálfsögðu vegna skapgalla og nú er hægt að fara í mjaltir án þess að koma til baka skítugur upp fyrir haus og með marða handleggi. Ég fékk þó Guðmund Steindórs til að dæma hana fyrst þannig að hún telur þegar kemur að því að dæma föður hennar. Hún fékk 82 stig og aðeins 3 fyrir skap. Hún var nefnilega hin rólegasta í fjósinu en í mjöltunum var hún rugluð.
Bredda 416 fór líka vegna lélegra afurða og spenagalla enda undan Brussu 1125 sem var holdablendingur.
Aría 425 fór líka en hún hafði beðið í nokkurn tíma eftir kaupstaðaferðinni hjá geldkúnum. Hún var drepin vegna mikilla júgurgalla. Guðmundur dæmdi hana áður an hún fór og hafði það á orði að hann hafi sjaldan séð jafn slæmt júgur.
Sú fjórða sem fór og jafnframt sú eina sem ég sá mikið eftir var Hneisa 363 Skandalsdóttir. Hún bar núna síðast með júgurbólgu sem ekki lagaðist þrátt fyrir meðferð og því ekkert annað að gera en að láta hana fara. Júgrið á henni hefði ekki gefið sig á þessu mjaltaskeiði og var bara nokkuð sterklegt, en þó sýndist okkur að með tímanum myndi þetta júgur geta gefið sig, en er á meðan er, þannig að mér fannst þetta skandall að svona skyldi fara. Verst er þó að hafa aldrei fengið kvígu undan henni en síðast bar hún nauti undan Aðli 02039 og var hann seldur í Hallland.

En nóg í bili ætla að notfæra mér fríið þennan langa dag og skella mér í sund.
Þórir.

Sæl verið þið.
Ég var að renna yfir bloggið mitt hér og sá að ég hafði aldrei sagt frá því þegar fjórar kýr kvöddu þennan heim fyrir fullt og allt í byrjun febrúar. Það voru þær Viðja 312, Viska 323, Blaðra 1141 og Rengla 412.
Viðja 312 var okkar elsta kýr fædd árið 2000 á Tunguhálsi í Skagafirði og keypt hingað árið 2002. Hún var undan Við 98002 og reyndist okkur vel og skilaði okkur nokkrum kvígum og á sú yngsta að bera núna í sumar, en það er hún Gyðja 447 Goðadóttir. Hinar dæturnar voru misjafnar, Mylla 325 Soldánsdóttir og Örk 345 Nóadóttir gerðu það ekki gott, en Spinna 401 Spunadóttir er nýbúin að bera sínum öðrum kálfi og virðist ætla að standa fyrir sínu. Viðja var orðin frumuhá og þess vegna best að láta þetta gott heita.
Önnur eldri kýr fór líka á sláturhús en það var hún Viska 323 Lóadóttir. Hún var komin með júgurbólgu og svo var júgrið orðið lúið, en það var reyndar aldrei neitt sérstaklega gott. Hún flaut bara á því hve góð hún var í mjöltum. Hún skilaði aðeins einni kvígu af 6 kálfum, en það er Gáfa 479 Spottadóttir.
Svo létum við Blöðru 1141 Þrymsdóttur fara en hún hljóp bara alltaf í spik og hélt illa á sér. Við ákváðum að láta hana fara þrátt fyrir að hún væri komin með fang og svo var ekki á bætandi að það hljóp í hana einhver júgurbólga. Blaðra var mjög stygg kýr og var leiðinleg í fjósinu og þurfti alltaf að hlaupa á undan manni um fjósið og gera allt vitlaust, en þegar kom að mjöltunum þá stóð hún eins og stytta. Það er til ein kvíga undan Blöðru og Prímus 07002 sem heitir Slufra 514
Rengla 412 fór svo líka vegna skapgalla og voru allir voða fegnir, en þá tók Hviða 419 systir hennar upp þráðin þar sem hún hætti og fær þess vegna að fara sömu leið. Ein kvíga er til undan Renglu en það er Blokk 423 Húsadóttir, krossleggjum bara fingur með hana.

Nýjar fréttir eru þær að Spinna 401 bar kvígu undan Þrym 02042, sem fær nafnið Spóla og númerið 551. Þarna er ég að reyna að stækka kýrnar því Þrymur var með hæstu einkunnina fyrir skrokk og Spinna er pínu lítil. Viðja gamla sem var móðir Spinnu var frekar lítil, þó aðallega lágfætt og var þess vegna sædd með Spuna 99014 sem þá átti að gefa stærstu kýrnar. Útkoman varð Spinna, pínulítil en þó falleg og fínasta kýr. Það verður bara að halda áfram að reyna og verður gaman að sjá hvort Spóla verði stærri en Viðja og Spinna.
Snudda 437 Rösksdóttir bar svo sínum fyrsta kálfi þann 20. mars, og var það naut undan Humli 07050. Snudda er stór og mikil kvíga eins og móðir sín og er hin rólegasta, allavega ennþá, en mér sýnist þó að þetta sé hin mesta geðprýðiskvíga, þó að ég hafi reyndar misreiknað mig stundum sbr Hviða 419.
Sama dag eða þann 20. bar svo Sylla 395 Jakadóttir nauti undan Síríusi 02032. Sylla er mjög seinmjalta og verður fróðlegt að vita hve lengi hún verður að mjólka núna þegar hún nær toppnyt. Í fyrra þegar hún var á fyrsta kálfi fór hún í 29 kg dagsnyt og núna hefur júgrið stækkað um helming ef ekki tvöfaldast. Júgurlögunin er mjög góð, en það er aðeins langt á milli framspena en þeir vísa þó í rétta átt þ.e beint niður.

En nóg í bili
Kv Þórir.

Það var verið að rukka mig um blogg.

Þannig er mál með vexti að ég skellti mér í búfjárræktarferð í Skagafjörðinn með Söru og skólafélögum hennar á Hvanneyri. Það voru skoðaðir svo margir staðir og frá svo mörgu að segja að ég hef fyllst "ritkvíða".
Þannig að það væri fínt ef Sara byrjaði að blogga og ég bæti svo einhverju við ef mér finnst vanta eitthvað. Ertu ekki til í það Sara, bara halda áfram hér neðan við

Krakkarnir á Hvanneyri lögðu af stað um hádegi frá Hvanneyri og brunuðu af stað í Skagafjörðinn, ég og Þórir komum hins vegar bara upp í rútuna í Varmahlíð. Fyrsti bærinn sem skoðaður var í ferðinni voru Stóru - Akrar, þar tók bóndinn við okkur hress og kátur og fræddi okkur um búskapinn þar. Á Stóru Ökrum er tiltölulega nýtt fjós með Sac mjaltabás. Mjólkurkýrnar og kálfar á mjólk eru í þessu nýja fjósi, en geldkýr og aðrir gripir í gömlu húsunum. Í nýja fjósinu er nokkuð flott gjafakerfi með saxara og færibandi sem færist í hring á fóðurganginum.
Næst var haldið á sauðfjárbú í Kjálka sem ég man ekki þessa stundina hvað heitir. (Sara það heitir Flatatunga) Þar á bæ er nýbúið að reisa stóran bragga frá Hýsi fyrir um 500 kindur. Um 200 þeirra voru inni við og vakti það athygli mína að kindurnar voru flestar í einskonar ,,strápilsum" (S.s órúnar að aftan)
Næsti bær og jafnframt sá seinasti á föstudeginum var Kúskerpi en það er kúabú með einum Lely mjaltaþjón og Weelink kerfi. Allt var grandskoðað og vakti þó mest athygli mína hve fallegur litur var á einni kúnni, en hún var svarhryggjótt og öll dröfnótt í framan, ótrúlega flott. (undana Teini)
Eftir að fólk var búið að skoða, drekka og syngja var haldið á Sauðárkrók þar sem við gistum báðar næturnar. Búið var að panta fyrir okkur pizzu hlaðborð á Ólafshúsi og var það orðin nokkuð langþráður matur enda vorum við ekki að byrja að borða fyrr en um 23 - 23:30 Eftir að allir höfðu borðað fylli sína og meira en það var haldið yfir götuna á Kaffi Krók (að mig minnir að staðurinn hafi heitið) en þar tryllti Rúnar F trúbador lýðinn

Á laugardeginum byrjaði dagurinn snemma, allir vaktir klukkan 8:00. Þegar búið var að koma fólki á fætur var labbað yfir í Mjólkursamlagið, en þar var okkur sýnd öll starfsemi og þar fengum við morgunmat, sem ég held að margir hafi verið glaðir með. Eftir að búið var að sýna okkur allt í KS var haldið af stað að nýju og nú lá leiðin að Garðakoti í Hjaltadal. Þar er kúabú með nýju fjósi sem inniheldur Delaval mjaltaþjón og Weelink kerfi (þeir eru greinilega mjög hrifnir af Weelink í Skagafirðinum). En það sem vakti mesta athygli á þessum bæ var lítil grá kvíga og sýningarpallurinn í fjósinu, eitthvað hefur hann nú kostað. Þegar búið var að grandskoða fjósið var lagt af stað að Hólum í Hjaltadal. (Bóndinn gat ekki svarað því, undan hvaða nauti kvígan var iss piss, svona karlar)
Á Hólum tók skólastjóri Hólaskóla við okkur, fræddi okkur um staðinn og sýndi okkur kirkjuna. Að því loknu fengum við hádegismat í mötuneytinu. Þegar allir höfðu borðað sig sadda var rölt af stað í rúturnar sem keyrðu okkur að reiðhöllunum og hesthúsinu. Þar fengum við að arka um allt og skoða aðstöðuna, ég vorkenndi nú bara einum hestinum því á miða fyrir framan hann stóð ,, Ég er í megrun " Ég var nú hreinlega bara farin að íhuga að gefa honum eitthvað nammi....en ætli það hefði nú ekki verið illa séð
Þegar hestafólkið var búið að skoða hesthúsið bak og fyrir var lagt af stað í heimsókn til Baltasars Kormáks og Lilju Pálmadóttur að Hofi, þau voru nú reyndar ekki við en vinnufólkið á bænum tók við okkur og sýndi okkur hesthúsið og alla aðstöðuna. Við erum að tala um að aðstaðan þarna var mun flottari en á Hólum og ég hugsa að hestamennina í hópnum hafi klæjað í fingurna þegar þeir sáu þetta. Sem dæmi var járningaraðstaða, þvottaplan fyrir hesta og þurkunarstöð, 50 fermetra hnakkageymsla, reiðhöll með speglum allan hringinn og svo má ekki gleyma stássstofunni  eða á maður að kalla það íbúðina upp á lofti. Ég hefði nú bara getað hugsað mér að búa þar. Þegar allir voru búnir að virða fyrir sér þennan draumastað hestamannsins var haldið á Hamar.
Á Hamri er nautaeldi, þar var hætt með mjólkurframleiðslu árið 2005 og síðan hefur verið nautaeldi þar á bæ. Bóndinn var nýbúin að slátra nokkrum slatta af Íslendingum, þannig við fengum nú ekki að sjá neitt hrikalega stórt, þó var þarna einn Limmi sem var orðin nokkuð stór þrátt fyrir að vera aðeins 18 mánaða. Þegar búið var að skoða nautaeldið var haldið upp í vélageymslu hjá bóndanum og þar bauð hann upp á veitingar, snakk og bjór, handa þeim sem vildu. Ekki var farið fyrr en allur bjór var búinn en það var enginn smá slatti sem bóndinn keypti, ég skil nú bara ekki hvernig hann týmdi þessu, einhversstaðar heyrði ég að þetta hefði kostað tæpar 70.000 kr. Það finnst mér heldur rausnarlegt. Þegar fólk var orðið vægast sagt mjög hresst var þakkað fyrir og við héldum af stað á Sauðárkrók.
Um kvöldið var farið á ball í Mælifelli þar sem Geirmundur Valtýsson lék fyrir dansi. Mikið stuð var á liðinu og mikið gaman

Vaknað klukkan 9:00 á sunnudeginum og byrjað að pakka og gera sig klára fyrir seinasta daginn. Þegar allir voru tilbúnir var lagt af stað á Syðra - Skörðugil, þar fengum við að sjá kindur, hesta og minka. Mér fannst lang skemmtilegast að fara í minkabúið, þó ég myndi nú aldrei geta verið með svona skepnur. Verið var að para nokkra minka þegar við komum og sáum við því nokkra hrottalega bardaga milli kynjanna inn í nokkrum búrum. Þegar allir voru búnir að skoða alla minkana, fóðrið þeirra og borða sig fulla af veitingum var haldið á Hjaltastaði.
Á Hjaltastöðum er fjós sem tiltölulega nýlega hefur verið breytt á tiltölulega ódýran hátt í hesthús. Kötturinn á bænum vakti sérstaklega athygli mína, hann var ótrúlega skemmtilegur, rosa gæfur og fallegur á litinn, enda var ég orðin nánast jafn loðin og kötturinn þegar haldið var af stað frá bænum. (Já Sara er mikið fyrir kisur)
Stoppað var í Varmahlíð og áður en við héldum á seinasta bæinn, en það var Sölvabakki í Húnavatnssýslunum. Þórir tók bílinn í Varmahlíð og hélt af stað í Eyjafjörðinn á nýjan leik en ég fór áfram með Hvanneyringunum á Sölvabakka. Þar eru kindur og hestar, þó aðallega kindur. Tvenn fjárhús voru á staðnum, eða raunar voru kindur í endanum á minkahúsinu á bænum en það var byggt árið 1987 og minkaeldi var þar í einhver 2 - 3 ár. Nú er hluti minkahússins notaður fyrir kindur og voru þau búin að hanna gjafaaðstöðu þar. Á Sölvabakka voru grillaðar pylsur ofan í liðið, þannig að allir gátu farið glaðir og saddir af stað á Hvanneyri. Það sem vakti mesta athygli mína á þessum bæ var að mjög margar kindanna voru einhyrndar (þau hafa ábyggilega verið að reyna að rækta einhyrninga).
Horft var á Dalalíf á leiðinni heim á Hvanneyri, að sönnum sveitasið, en þegar þangað var komið fóru flestir með töskurnar sínar heim en hlupu svo á barinn til að fá fría bjórinn og skotið sem Snorri var búin að lofa liðinu. Ég fór nú reyndar bara heim að sofa enda orðin mjög þreytt eftir skemmtilega ferð

Já sæll.
Það er bara búið að snjóa hér undanfarið og mér finnst alveg vera komið nóg, rúmir 30 cm af púðri er ágætt fyrir minn smekk, það verður líklega spennandi þegar kári tekur upp á því að blása þessu til eða þannig.
Við höfum aðeins þurft að grípa í jeppana í sæðingunum og í dag keypti ég betri vetrardekk undir súbbann sem ég er á, var alveg búinn að fá nóg af spóli upp heimreiðar og götudansi á Akureyri.
Það er búið að vera nóg að gera hjá okkur Söru síðan á þorrablótinu því nefndin þurfti að endurtaka atriðin sín fyrir félag aldraðra í Eyjafjarðarsveit þegar þeir héldu þorrablótið sitt. Svo tók við sextugsafmæli og þrítugsafmæli þar sem við Sara vorum bæði að spila og syngja, reyndar sér Sara alfarið um að spila á hljóðfærin og ég góla bara eitthvað með.
Þessari törn er loksins lokið og ég sé fram á það að geta verið eitthvað heima hjá mér á kvöldin næstu daga í fyrsta skiptið í langan tíma, útskýrir kannski þessa bloggleti undanfarið.
Jæja nú skrifa ég um kýr.
Ég var búinn að segja frá því að Aría 425 Glannadóttir hafi borið og var að tala um að júgrið á henni hafi slitnað niður og að við ætluðum að senda hana á sláturhús með næstu ferð, en viti menn júgrið lagaðist og er nú eins og ég óskaði mér......................... nei ekki alveg kannski bara í fjósinu hjá Munkhausen, en júgrið á Aríu fór semsagt allt til fjandans og það kom júgurbólga í alla júgurhlutana og hún mjólkaði aldrei nema sirka 5 kg á dag, þannig að við hentum henni bara til baka í geldkýrnar og þar bíður hún eftir að komast í kaupstaðinn.
Svo var ég líka búinn að segja frá henni elsku Hviðu 419 sem ég hélt fram að gæti orðið góð kvíga og myndi mjólka vel og verða miklu betri í skapinu en systir sín Rengla 412. Í stuttu máli, þá má ég éta þetta ofan í mig, því Hviða er þrælvangefin í skapi. Hún var svona viðráðanleg fyrst en núna þá bölvar hún og ragnar og sparkar ógurlega. Maður reynir ekki einu sinni að hefta hana því ef hún finnur að maður sé að setja spotta á löppina á henni þá má maður þakka fyrir að halda höfðinu. Við bindum bara spotta í hálsbandið á henni og strekkjum hana alveg eins aftur og hægt er þannig að hún geti ekkert hreyft sig fram og aftur. Þá er í lagi að þvo hana og setja á hana og hún er góð þangað til að það fer alveg að verða búið úr henni. Þá setur maður hendina aftan við mjaltatækin, ef maður þorir, og þá getur maður varnað því að hún sparki af sér, en þetta er ekki fyrir hvern sem er. Svo þegar búið er í henni og tækin detta af henni þá sveiflast þau á arminum í átt að henni og þá fyrst tryllist hún og þá er betra að vera ekkert fyrir. Stundum er hún búin að sparka svo mikið í innréttinguna fyrir aftan sig, að hún tyllir varla í löppina þegar hún gengur út. Ég vona svo sannarlega að þetta naut Hávarður 05010 sem þær systur eru undan komist ekki áfram því miðað við þessar kvígur þá er þetta ekki góð viðbót í ræktunarstarfið. Mæður þessara kvígna eru undan Lykli 02003 og Völustakk 01026 og þið getið bara flett upp á skapeinkunn þeirra og séð að varla hafa þær þetta þaðan. Ég er farin að kíkja eftir því á sæðingarspjöldum hjá bændum hvort þeir eigi einhverjar kvígur undan þessu nauti og ef ég hitti bændurna þá ætla ég að spyrja þá út í þær og athuga hvort að þetta sé svona á fleiri bæjum.
Nýjasta kvígan hennar Söru mætti á svæðið fyrir um hálfum mánuði og er komin í stíu út í fjósi og virðist bara kunna vel við sig í eyfirskri fjósafýlu. Þetta er róleg kvíga og er frekar loðin og er ekki farin að ganga úr hárunum eins og allar hinar kvígurnar hér, enda fékk hún að vera undir berum himni í Borgarfirðinum.
Ég setti inn eina mynd af henni hér undir möppunni "'Úr fjósinu" og lét líka fylgja mynd af kvíguhópnum á Refstöðum því þar sést vel hversu margar hvítar kvígur eru þar.
En af hinum kúnum er allt ágætt að frétta nema kannski Hneisu 363 sem fékk júgurbólgu rétt eftir burðinn og lagaðist ekki mikið við að vera tekin á kúr þó að eitthvað hafi hann þó slegið á bólguna. Hún er semsagt bara mjólkuð í kálfana núna og er að mjólka rúmlega 30 kg. Skvísa 354 Vængsdóttir, Totta 1170 (hn), Villa 295 Spunadóttir, Klukka 355 (hn), Klöpp 343 Stórasteinsdóttir og Yrsa 317 Náttfaradóttir eru allar að mjólka um og yfir 30-35 kg á dag og meira að segja Skörp 367 sem aldrei hefur sýnt neina sérstaka afurðahæfileika fer í 30 kg á góðum degi.
En nóg í bili takk fyrir.
Þórir  
 

Góðan og blessaðann daginn

Seinustu helgi skrapp Þórir hingað á Hvanneyri til mín. Margt var brallað, þó aðallega reynt að finna sér eitthvað að gera.
Á laugardeginum fórum við í bíltúr til að skoða borgfirskar sveitir. Við keyrðum Flókadalinn og Reykholtsdalinn og enduðum svo upp í Húsafelli og keyrðum svo Hvítárssíðuna heim.
Á leiðinni stoppuðum við, við Barnafoss eða Hraunfossa. Ég mæli með því, fyrir þá sem ekki hafa litið augum þennan stað að skreppa þangað við tækifæri, því fegurðin er gífurleg svo ekki sé talað um strauminn í ánni. Maður myndi ekki vilja detta út í, það eitt er víst.
Á sunnudeginum drifum við okkur upp á Refsstaði til að hjálpa Hákoni á Svertingsstöðum og Þorbjörgu konunni hans að reka inn kvígurnar á Refsstöðum og ná nokkrum útvöldum frá, sem hljóta þann heiður að fá að búa í Eyjafirði eftir nokkra daga.  Því eins og kannski sumir vita, var ég að kaupa mér eina svargrönótta kvígu þaðan. Þetta er kvíga undan Meltingu frá Nýjabæ undir Eyjaföllum og heimanautinu Hvít Hvítingssyni frá Refsstöðum. Mig hefur alltaf langað til að eiga svargrönótta kýr og nú gafst tækifærið svo ég sló bara til. Svo má ég nú ekki gleyma því að ég er alltaf að reyna að ná upp í kvótann fyrir tilvonandi tengdaforeldra mína  hahaha.

En nóg í bili héðan af eyrinni....

kv Sara María

Má til með að setja hér inn link á video sem var í annálinum eftir Jón Gunnar Benjamínsson frá Ytri-Tjörnum

Jón bóndi og hasar í heitpottinum
http://www.youtube.com/watch?v=wYThlFuBMb4&feature=fvsr